THLARAU THIANGHLIM PAWIMAWHNA
- Robinson Sailo
Diakkawn, Kolasib
Thlarau Thianghlim kan tih tak hi Pathian laka mi; mihring thlarau ni lo sawina a ni a. Grik mi thiamte chuan, “Mihring thlarau hi taksaah Lung In(Jail) angin khuahkhirh tlat a ni,” an ti thin a. Tuna Pathian Thlarau Thianghlim ka’n sawi tum tak hi chu Pentecost nia Jerusalem pindan chungnunga thleng, mi 120-in an chan; an danglam vekna leh mi thara siamtu Pathian Thlarau Thianghlim ang kha a ni.
Pathian Thlarau Thianghlim hi a pawma pawm chi mai a ni lo va. “Ka hre thiam vek e” tiha hriat thiam mai chi pawh a ni lo. A chana chan tur chi a ni. Tin, chang leh dawng anga inngaih mai chi a ni lo va, a changtute chu mi danglamah a siam a, hmuh theih leh hriat theihin a lang chhuak thin a ni zawk a ni.
Thlarau Rah Chi 9 Te:
1. Pathian leh ringtu inlaichinna atan: Hmangaihna te, hlimna te, remna te a thlen thin a, Thlarau Thianghlim changtute leh Lalpa inkarah hengte hi a thlen thin.
2. Ringtu leh a rawngbawlpui dangte inlaichinna atan: Dawhtheihna te, ngilneihna leh thatna te a thlen a, rawngbawlna biruak tha siamtu a ni.
3. Ringtu mi mal nun atan: Thlarau Thianghlim hian ringtu mi mal hman atan Rinawmna te, insumtheihna te leh thuhnuairawlhna te a thlen thin.
Heng Thlarau Thianghlim rah chi kua te hian a chunga kan tarlan ang hian, Pathian leh mihring, Ringtu leh ringtu inkarah leh ringtu mi mal nun atana tangkai tak takte a thlen avangin a pawimawh em em a ni.
Thlarau Thianghlim Pawimawhnate:
Thil reng reng a pawimawhna a nasat leh nasat loh chhan ber chu - A hnathawh theih/thiltihtheihnaah te a innghat thin. Mi thiamna sang chu a thiltihtheihna a sang a, mi thiam lote aiin an daihzai a; chuvangin, an pawimawhna a sang a ni. Computer hnathawh theih chu Type Writer ai chuan a nasa zawk hle a; chuvangin, a pawimawhna leh a hlutna pawh a nasa zawk hle a ni.
Pathian Thlarau Thianghlim pawimawhna chiang taka zirchhuah dawn chuan Thlarau Thianghlimin a tih theih/thawh theihte a hnuaia tarlan ang hian sawi fiah ta ila, a fiah ber ang.
Thlarau Thianghlim chu-
1. Fa nihna min chantirtu a ni. (Rome 8:14) Pathian fa nih theihna a ni- a pawimawh hle mai.
2. Nunna/Chatuan nunna min siamtu a ni. (Rome 8:6)
3. Mitthi zing ata min kaithotu tur a ni. (Rome 8:11) Hei hi ringtute beisei ber, Thawhlehna siamtu a ni.
4. Thu tak min hriattirtu a ni. (Johana 6:13)
5. Chhinchhiahna (Seal) a ni; Lalpa’n min chhinchhiahna a ni. (Ephesi 4:30; Ephesi 1:13)
6. Thlamuantu a ni. (Johana 14:26)
7. Zirtirtu a ni. (Johana 14:26)
8. Tichaktu a ni. (Roreltu 14:10 & 16:13)
9. Tihuaisentu a ni. (T.T. 4:31)
10. Hriatpuitu a ni. (T.T. 1:8 & Rome 8:11)
11. Thiltihtheihna a ni. (Rome 15:18)
12. Hriat lawktirtu a ni. (1 Tim. 4:1 & Johana 16: 13)
13. Chawlhna a ni. (Isaia 28:11-12)
14. Min tawngtaisaktu a ni. (Rome 8:26)
15. Hruaitu a ni. (Roreltu 6:34)
Isua thuhretu nih ngamna, thiltihtheihna nena do rawnna karah pawh nghet taka din theihna chu Thlarau Thianghlim chan hi a ni.
Thlarau Thianghlim Pek Kan Nih Chhan:-
2. Pathian hnena ringlomite hruai nan
3. Mite siamthat nan.
4. Tihchak nan.
5. Zilhhau nan.
6. Hrilh lawk nan.
* Isua ropuina tur leh ama mite sawt tlanna atana pek kan ni.
Kohhran sawt tlanna tura Thlarau Thianghlim thilpek chi hrang hrangte:-
Pathian Thlarau chan pawimawhna chu Thlarauvin a thlawn liau liaua a changtute a pek, mihring/ringtute tana pawimawh leh tangkai em em site hi a ni. Thlarau Thianghlim thilpekte tangkaina leh pawimawhna te chu hetiang hi a ni:-
1. Finna: Daniela te, Solomona te hnena Pathianin finna a pek ang: Thuril inthupte hriat theihna, rorel thiamna leh khawvel mite’n zirna hmanga an neih theih loh, Thlarau finna ril a ni.
2. Hriatna: Tirhkoh Paula’n lawng chhiat tur a hre lawk thei tlat mai. (TT 27:22-26) Hun danglam tak lo thleng tur hriat lawk theihna a ni.
3. Tihdam theihna: Taksa, rilru leh Thlarau dam theihna leh ramhuai pawh thunun a, hnawh chhuah theihna Pathian Thlarau Thianghlim atanga dawn a ni.
4. Rinna: Rinna nei turin thlarau a ngai a, thiltihtheihna nei pha tur khawpa rinna hi Thlarau atanga dawn a ni.
5. Thilmak tih theihna: Mosia Thilmak tih ang chi te, Paula rulin a chuk a, engtin mah a awm loh ang chi te(Exodus 4:1-9; TT 28:3-16) Pathian ropuizia inpuan nan te, thlarau atangin ringtute’n an dawng thin. Rawngbawlnaah a pawimawh hle.
6. Thuhril theihna: Thlarau atang thuhrilna hi mi siamthatna atan thil pawimawh tak a ni; a ngaithlatute thinlung chhungril ber a den phak avangin.
7. Thlarau hriat dik theihna: Thlarau nazawng ring suh u; fiah zawk rawh u. (1 John. 4:1)
8. Tawng chi hrang hranga thu sawi theihna: A tul dan azirin Lalpa’n Thlarau atang chuan ringtute nunah a thlen thin. A tangkaiin a pawimawh hle a ni.
9. Tawnghriatloh hrilhfiah theihna: Pathian thlarau atanga dawngtute chuan mahni tawng angin an lo hria a, mipui/kohhran tana pawimawhte an letling thin.
10. Thlarau changtute tan a thlamuanthlak; min dotute chu Lalpa dotute an ni. Thlarau Thianghlim nei mi do chu, pathian do an ni.(Paula, Damaska khawdai).
0 Comments