PENTECOST NI

PENTECOST NI

- Tirhkoh F. Lalnienga (Sena)

Vengthar, Kolasib

“Pentecost ni” tih hi sawi fiah hranpa pawh ngai lo khawpin Kohhranhote’n kan hmelhriat em em tawh a. Greek \awnga ‘Pentecost’ tih kha letling kher lovin “Pentikos ni” tiin kan lo hmang zui ve mai a; a awmzia chu ‘Sawmnga-na’ tihna a ni. Israel fate’n kût pawimawh an hman ngei ngei tura Pathianin a pêk pathum zinga pakhat a ni a, Thuthlunghlui lamah chuan Chawlhkar Kût tiin a sawi ve thung a; Kalhlen Kût an hman \an ni a\anga chhiar \anin ni sawmngana-ah ( Chawlhkâr Sarih zawh chiah) an hmang \hin tur a ni (Exo.34:22; Num.28:26; Deut.16:10). Kalhlen Kût a\anga ni sawmngana-ah chiah an hman \hin avangin Pentecost (Sawmnga-na) tih hming hi a pu zui ta zel niin a lang. Hemi ni hian an thlai leh buh tharte Lalpa hnena hlanna ni atan leh hlimna ni atan an hmang \hin tur a ni (Lev.23:17, 23:20; Num. 28:27-31).
Thuthlung thar lamah chuan Lal Isua a thih a\anga ni sawmnga-na chiah a ni ve bawk a, Juda-te Kût pawimawh pahnih leh Thuthlung thar lama hun pawimawh chi hnih a inrual chiaha a thleng hian awmze ril zâwk a nei ngei ang. Aigupta bawih ata Lalpa’n a hruai chhuahzia hriat reng nan mahni intihrehawmin khunkhàn taka Kalhlen kût an hmang hian Khawvel sual bawiha tângte min chhandam tura kan Lalpa Isua thihna an lo entir lâwk a, Chawlhkâr Kût (Pentecost)-ah hian an thlai tharte Lalpa hnena hlànin hlimna ni atân an hmang \hin hian Pathian thutiam anga Thlarau Thianghlim lo thlenna tur chu an lo entir lâwk bawk a ni. Chutichuan, Thuthlung hlui lama an hman \hin vàng ni lovin, tuna kohhranhote tân ni pawimawh leh lawm tlâk a nih avàng zâwkin Pentikos ni hi kan làwmin kan hmang \hin tur zâwk a ni ang.
Pentecost ni pawimawhnate:
1. Kohhran din \anna ni a ni: Lal Isua’n khawvelah Pathian chibai buktu dik tak, a mahin a phun kohhran a lo la din tur thu a sawi a (Joh.4:23-24; Mat. 16:18). Lal Isua phun kohhran dik tak lo din \an ni chu he Pentikos ni hi a ni.
2. Chanchin |ha dik tak puanchhuahna ni a ni: Isua’n vàna a làwn dâwna a thuchah hnuhnung ber chu— a thihna, phuma a awmna leh a thawh lehna avanga Chanchin |ha chu khawvel zawng zawnga hril turin thu a pe a (Mt.28:19-20; Mark. 16:15,16; Lk.24:44-48), Isua thupek ang thlapa Chanchin |ha dik tak an puan chhuah \anna ni chu a ni.
3. Thlarau Thianghlim lo thlen ni a ni: Isua khawvela a lên lâi pawh khan Thlarau Thianghlim chu mi tin tân pêk a la ni rih lo va (Joh.7:39); mi zawng zwng tâna Thlarau thianghlim pek an lo channa hmasa ber chu Pentikos ni hi a ni.
4. Thuthlung thara Piantharna hmasa ber a ni: Pathian rama (Vanram) lût tur chuan tuiah leh Thlarau-ah piangin, pianthar (Born again) ngei ngei a ngai a ni tih kan hmu a ( Joh.3:4,5), Thuthlung thar (Isua thisen hmanga thu thlun) a lo awm hnua Pathian thu anga Piantharna dik taka an piantharna hmasa ber a ni.
5. Thuthlung Thar Maichàm hmasa ber a ni: Eliza leh Ba-al puithiamte’n maicham dik zâwk nih inchuha an inel ang khân tunlaia Pathian betu inti, maicham hrang hrang kiltute pawhin maichàm dik tak kan tehna tur chu Pentecost ni-a Pathian an biakna maichàm hi a ni a. Thuthlung hlui lama Pathian an biakna maichàm chu Lalpa’n a hnâwlsak tawh a, Thuthlung thara Pathian maichàm dik tak lo pianna chu Pentikos ni-a mi tho hi a ni.
A chunga kan han tarlan bâkah khian Pentecost ni pawimawhna sawi tur tam tak a awm thei ang. Amaherawhchu, tuna kan han tarlan a\ang ringawt pawh khian kohhranhote tâna ni pawimawh a nihzia te, kohhranhote’n hriat renga ropui taka lawm tlak a nihzia te kan hriat thar fo a pawimawh hle a ni. Tin, tunlaia kohhan inti zawng zawngte’n Pentecost ni hi Pathian phun kohhran dik tak lo pianna - ni a ni tih kan pawm tlâng vek a; mahse, an inzirtirna leh an tih dante erawh pawm chin leh hnâwl chin nei, kohhran intite zingah, kan tam ta hle mai a. Kohhran inti chunga Krista lu atâna hmang lo va; Pathian thu hnâwl \hena mihring Dàn siam chawp rin zâwkna hi a thuneitu Pathian zah lohna leh rin lohna— Pathian pawisawina râpthlâk tak a tling thei a ni tih pawh kan hriat tel a pawimawh hle a ni.
Aw le! Pentecost ni-a Thlarau thianghlim pek chu an hmuh theihna tura rilru hmun khata \hahnemngai taka an \awng\ai ang khân (T.T 1:14) Kohhranhote pawhin Thlarau Thianghlim malsawmna nasa zawk kan chan zel theih nan thinlung hmun khata kan awm fo te, \hahnemngai taka \awng\aina te kan neih fo a pawimawh hle a ni.
Kohhran hmasa berte’n an inzirtirna leh an tih dànte chhawm nung zelin, Thlarau Thianghlim hnathawh humhalh a, Pathian thuthlung ropui tak puanchhuahna ni atân te he ni hi hmang \angkâi thiam i la; kohhranhote’n Thlarau lam malsawmna thar kan chan zel theih nân chhiartu zawng zawngte Lalpa’n malsawm che u rawh se!