- Robinson Sailo
Daiakkawn,Kolasib.
India rama UPC kohhran lo din dan hi thawnthu ngaihnawm tak a tling a, chipchiar takin ziak vek hman lo mah ila, a tlangpui i lo thlir ho teh ang.
Kum 1945 September, ni 25 (Thawhlehni) zing dar 10:00 a, United Pentecostal Church tih hming pu a khawvela pawl thar a lo pian atanga kum thum leh thla li-naah India ramah chanchin tha famkim hril turin Missionary tirh an rel nghal a, Rev. Ellis Luther Scism-a te chhungkua chu India rama Missionary hna thawk turin an rawn tir lut ta a ni. Ni 31 January, 1949-ah Port land Dock lawng chawlhna atangin M/V China mail lawng lianah EL Scism-a, a nupui Marjorie Scism leh a fapa kum 13 mi Harry E.Scism leh an fanu kum 12 mi Leonore-i te chuan India ram pan turin USA an chhuahsan ta a ni. Khawchhak lamah te kalin Japan ram te leh ram tam tak kal pelin ni 55 zet tuipuia hun an hman hnu-ah ni 26.03.1949 tlai ni tlak rual velin Madras lawng chawlh hmun an lo thleng ta a ni. Chumi zan chuan lawngah an riak leh nghe nghe a, a tuk ni 27.03.1949 ah chanchin tha famkim meichher chi turin India ram leilung an rap ta a ni.
Madras-ah hian an motor (Jeep) ken registration ti tur leh thil tul dang ti turin ni sawmpakhat lai an cham ta a; ni 7 April, 1949 ah Kodaikanal an pa ta a, Kodaikanal-ah chuan awmhmun an bengbel ta a ni. Tin, Kadur hmun chu an rawngbawlna sattion pawimawh tak a ni bawk a, kum 1968 hmalam zawng kha chuan Adur Bible School bak hi India ramah Pathian thu zirna a awm lo a ni.
Hindu kulh bang bela lo awm, hmakhawsang atanga Hindu zirtirna leh Sakhuana lo vuantute chu chanchin tha famkim nen ‘Isua lo chu Pathian dang a awm lo’ tih thu chu an hril tan ta a ni. Ngaihsaktu, hmel hriat leh hmangaihtu pakhat mah awm lohna ramah chanchin tha chu an vahvaihpui tan ta a ni. Kodaikanal hi an inbenbelna hmun mah ni se, Adur leh Travancore-ah rawngbawl nan hun an hmang tam zawk a, Adur hmunah phei chuan Bungbalow tha leh changtlung takin an sa, tun thlengin a la ding nghe nghe a ni.
India chhim lam atanga bul tanin India ram hmun hrang hrangah rawngbawlna a darh zau zel a, kum 16 zet India ram rawng a bawl hnuah taksa lam hrisel tawk lohna avangin kum 1966 khan USA-ah a haw leh ta a ni. India rama rawng a bawl lai hian member 30000 (Singthum) lai an awm hman a, Mizoram chu member tamna niin, bul an tanna India chhim lamah pawh member tha hnem tak an awm bawk a ni. Tichuan, India UPC chu hmun hnihah thenin India Unit (Chhim lam) leh N.E India UPC tiin then hran a lo ni ta a, hetih hun lai hian India hmar chhak N.E.I ringawt hian member 20000 (Singhnih) bawr vel an nei a ni.
He UPC kohhran India rama lo ding hi Harry Scism chuan a pa aiawhin a awp chhunzawm ta a, Rev. Harry Scism -an a enkawl atang hian Leadership lamah buaina neuh neuh lo awmin kum 1980 khan India UPC ho chu an lo keh darh ta a ni; Immanuel Penticostal Church tih leh Jesus Name Pentecostal Church tiin pawl thar a lo ding ta a ni. India UPC anga la awm chhunzawm zelte hi Rev. Harry-a fapa Rev. Stanley-an a awp chhunzawm zel a, amaherawhchu, vanduaithlak takin tlem lam an pan zel a ang.
N.E.I UPC te pawh lo darh zau zelin pawl tahr lian bera kan ngaih Presbyterian dawttu-ah an awm chho ta hial a, kum 2011 Conference report bu a lan danin member 91720 awmin, mipa 45864, hmeichhia 45856 leh ministerial licence nei mi 880 an awm a ni. N.E.I UPC chu district 11 laiah inthenin rawngbawlna neih a ni.
N.E.I UPC te chuan ropui vea an inngaih leh inhriat lai takin kalphung leh dan (Bye Law) te a that tawk loh vang leh hotute lama inlungrual tawk lohna avangin an keh sawm leh ta ni.
(Chhunzawm tur - Mizoram UPC lo pian dan)
0 Comments