BAN PHAR MEUHVIN KA TLAN ANG CHE U

                                                           -  Tk. Thartea

    Exodus 6:6-ah chuan, "Chuvangin , Israela thlahte hnenah chuan, kei JEHOVA ka ni a, Aigupta ho phurrit lak ata hi ka hruai chhuak ang che u a, an bawiha in awm hi ka chhuahtir ang che u; tin, nasa tak a ngaihtuah che uin ban phar meuhvin ka tlan ang che u", tih thu kan hmu a, he thu a ban phar meuhva Pathian in a mite a tlanna hi eng lak a ta nge tih-ah hian ngaihdan hrang a awm thei a, mi tam takin kan kawhtir chu Lal Isua'n Kalvaria min rawn tlanna hi a ni. Pathian thu hi a hausak em avang hian tawngkam khat(Sentence) hmang pawh hian kawng hrang hrangin a sermon theih a, Pathian thu chhuina(theology) leh rindan (theory) hrang hrang pawh a piang nasa hle a ni. Chuvangin Exodus 6:6 thua ban phar meuhva tlanna chung changah pawh hian sawidan hrang hrang a awmthei a, mahse a thu kalhmang tlangpui(context) ațang leh Bible châng dang hmangin eng a sawina ber nge tih erawh kan zir dawn a ni.

      Exodus 6 thu hi a tir ațanga kan chhiar chuan, Pathian leh Mosia inbiakna a ni tih kan hre thei a.Hetih hunlai hian Aigupta sorkar hnuaiah Israel fate chu salah an tâng mek a ni. Israel faten an saltanna ațanga an mangang rum thawm chu Pathian in a hria a(6:5); tichuan, Pathian chu JEHOVA (Chhandamtu) anih ang ngeiin Aigupta-ho phurrit lak ata chu hruaichhuak turin leh an bawih ata chhuahtir tur in nasataka ngaihtuah chunga ban phar meuhva a tlantur thu a sawita a ni(6:6).

AIGUPTA ATANG A HRUAICHHUAH ANNIHNA KHA TLANNA A NI -

Israel fate Aigupta bawih ata hruaihchhuah an nihna kha tlanna ngei chu ani tih heng Bible chang ațang te hian lo en ta ila:

Isaia 43:1 "Tunah erawh chuan, aw Jakob-hote u, LALPA nangmahni siamtu leh aw Israel-hote u, nangmahni dintu chuan heti hian a ti: "Hlau suh u, ka tlan tawh che u hi; in hmingah ka ko che u a, ka ta in ni si asin."

Deuteronomy 9:26 Tin, LALPA hnen ah chuan ka tawngtai a,' Aw LALPA Pathian, ropuinaa i tlan, kut chak taka Aigupta ram ata i tlan chuah, i mite leh i rochante chu tiboral suh ang che.

2 Lalte 17:36 - LALPA, thiltihtheihna nasa tak leh ban phar meuhva Aigupta ram ata hruai chuaktu che u amah chu in țih zâwk tûr a ni a, amah chu chibai in bûk tûr a ni a, ama hnenah in inthawi tûr a ni.

     Heng Pathian thu ka'n han tarlan ațang hian Pathianin banphar meuhva a tlanna chu Israel fate Aigupta bawih ata a hruaichhuahna hi a ni tih kan hre thei a ni.

BAN PHAR MEUHVIN –

"Ban phar meuhvin ka tlan ang che u" tih țawngkama hman avang hian Kalvari-a Isua an khenbehna hi kawhtir awl tak leh thil inhmeh tak anga lang pawh ani a; nimahsela, Kalvari Kross-a Isua an khenbeh khan a ban a phar lova, a zangphar zawk a ni.

Ban phar tih thu hian zangphar lam a kawk lo a, Pathianin chhechham la Israel fate Aigupata bawih ata a hruaichhuah ngeitur thu a tiamna tawngkam a ni.

      Hmanlai Judate khan an thil tihtur chu an hlen ngei ngei dawn ani tih an nemngheh nan rorelna hmun ah te ban phar meuhvin an sawi thin a, chu chu an intih rinawmna leh an tingei ngei dawn a ni tih tihlanna a ni.

      Chutiang bawkin Pathian chuan a mite chu Aigupta bawih ata hruaichhuakin a tlan ngei ngei dawn a ni tih an hriat theihnan ban phar meuhvin tih thu hi a rawn hmang a, a sawi ang ngei chuan a tlan ta bawk ani tih kan hmu bawk a ni. Hetiangin-

Deuteronomy 5:15- Nang pawh Aigupta ramah khan bawih i ni tawh a, LALPA i Pathianin chuta ta chu kut chak tak leh ban phara a hruai chhuah che i ni tih hre reng rawh; chuvang chuan a ni, LALPA i Pathianin chawlhni serh tur thu a pêk che ni.

       Heng ka'n sawitâk ațang te hian Aigupta sala tâng mêk Israel fate chu Pathianin a hruaichhuak a, ban phar meuhvin a tlan a ni tih kan hre thei a; chutihrual chuan, Mosia hmanga Pathianin Aigupta bawih ata Israel fate a hruaichhuahna hi Lal Isua'n sual bawiha tâng te Kross-a min rawn tlan chhuah lehna hlimthla a ni tih erawh a pawmawm em em a ni.

Atawp ber ah chuan, Aigupta bawih ata Israel fate ban phar meuhva tlan tu JEHOVA kha tisain alo lang a, Kalvari-ah min rawn tlan a. Amah chu lei leh van siamtu Pathian awmchhun ani.

Chhiartu zawng zawng te Lalpa'n tam takin malsawm rawh se.