KRISMAS HMAN DAN THA

KRISMAS HMAN DAN |HA

Kamliana Lhouvum

Kum 2016 Krismas chu kan lo thleng leh dâwn ta reng mai; kum bul ata “tlumte thlira kan lo thlir” a ni miau a, a mi den dàn pawh a dang zar mai. Ze hrang hrang nei, ngaih dan hrang hrang nei leh rinna hrang hrang neite kan nih nuk hlawm avang pawh a ni ang e, Lal pian hun champha kan hman dàn leh kan lo dawnsawn dàn pawh a inang lo nuaih mai tih chu a chiang hle. Mizote hi ze nghet lo, a huhova huai êm êm; a mi mal ang zawng erawha dawih hle si kan ni tiin an sawi fo \hin. Chu lo rêngah pawh, thil intihhmuh hnam kan ni a; \henawmnuin emaw, \henawmpain emaw \ha a tiha min sawihmuh chuan awi duh nghal mai zel hnam kan lo ni niin a lang bawk. He kan hunpui lo thleng turah pawh hian chin dan leh tih dan \ha lo tak tak- Khawthlang lam ramte nun dan, kan Mizo culture nena inmil miah lo kan seng luhte pawh a awm nuk a ni. Chutihrualchuan, khawvel hmasawnnain a ken tel sualna leh chin dan \ha lote pawh dan rual lova min runtu erawh a awm tho mai.

Mizote hi Kristian kan lo nih a\angin kum tin Krismas kan lo hmang tawh \hin a; Mahse, kan hman dan erawh a dal/ lem sâwtin hmânlai Mizo Kristian kal hmasate tih dàn leh hman dànte kha kan pha ta lo hle mai. Kristian nunah chuan a hmânlai apiang hi a Kristian bik em maw ni chu aw? tih theih a ni a, kan changkâng telh telh a, kan lem telh telh a, kan rinna a da telh telh a, “ chawhpawlh nun” kan thiam telh telh mai. Tûn hmaa Lal piancham kan hman dan leh tùn hnua kan hman dan chu inthlàu tak a ni. A enga pawh chu lo ni se la, Krismas kan hman dàn dik leh Kristian dik takte tâna kan nun dàn tùr – Lal piang kan lo hmuah dàn tùr tlêm azâwng han tarlang i la; kan tih loh tùr thilte pawh kan târlang tel bawk ang.

Inkhâwm chungchângah: Hmânlai kan pi leh pu te’n Krismas an lo hman dàn kan hre \heuhvin a rinawm a; inkhawm leh Biak In emaw, lènkhâwmna hall emaw-a Pathian fak leh chàwimàwina neih ho kha an uar ber leh nuam an tih berte zinga mi a ni. He kan hunpuiah hi chuan aw chhâng khawp leh aw \ial khawpin an zâi ho \hin a, a Krismas bik riau a ni. Tunlaiah erawh Biak ina inkhawm kan tlêm mai ni loin lènkhàwm leh zàikhàwmnate phei chu kan hlut ta lo hle mai. Biak ina zaikhàwma lenkhàwm ai chuan mahni in lama lo tawm emaw, khawlai lo lèn emaw te kan ching chho ta. Lal lung kan tiawi zo ang em? tih chu zawhna lian tak a ni.

Biak In chei, mahni in leh kawtlai chei: Tunlaiah chuan a nei leh nei lote pawhin kan tum ber leh kan châk ber, Krismas ti-krismastu leh a tel lova masi lo riauva kan hriat chu- Veng chhûng chei leh Biak in chei tih te hi a ni àwm e. Veng chhûng chei, khaw chhûng chei leh Biak in cheite chu a \ha na meuh mai; mahse, a \ul ber leh kan mamawh ber a ni ang em? Pathian Biak ina kal leh inkhawmna Ina kal aia kawtlai chei en tura tei kual vêl mai mai kan tamzia thlir hian thil \ha nge \ha lo tih chu kan hre mai àwm e.

Traffic police hlauh hun: Pathian rawngbawltute leh mi \ha takte tân Traffic Police-te chu an hlauhawm loh tehlul nen, hemi hunpui vuakvétah hi chuan Pathian aia traffic police man hlâu zâwk kan tam leh ngawt ang. An sawi fo \hin angin, heti ang traffic police hlâu zingah hian |halai hruaitu \ha tak tak te, rawngbawltu \ha tak tak te leh nula leh tlangval hmêl \ha leh class hmèl tak tak te pawh an awm nuk e an tih chu! Tak tak ni ang maw? Kan Kristianna leh kan nuna Chanchin\ha kan nunpui dan hi kan inen let fo a ngai a ni. Mi fel, mi dik leh Kristian \ha tân hemi hunah hian traffic police hlauhna tùr chhan chhe te mah a awm eih lo a ni.

Zu, Mipat hmeichhiatna leh nawmsipbawlna kawngah:  Mizote hi kan pi leh pu te ata mipat hmeichhiatna lama sâng kan ni niin a lang a; Mizo history leh khawtlâng inrelbàwl dàn en hian a hriat theih a ni. Tin, Kristian kan nih hma- lung bul thing bul  kan biak hun lai a\ang daih tawh khân Pialralah pu Pâwla sài hlauh avàngin nula leh tlangval, mipa leh hmeichhia te kha kan lo buai ru nasa viau mai, sawi thui lo mai ta i la. Chumi nun chu Kristian kan nih hnu pawh hian kan la chhawm nung chho zêl a; a \ha lo tih hre mah i la, kan thisenah a bet nghet deuh em maw ni dawn? Kan sim thei tak tak lo a nih ber hi. Tin, zu chungchângah pawh hian chuti tho- Zu leh sa ngaina mi, rual pàwl nân leh thiltihpui nikhuaa zu leh sa nèna âm taka hmang \hin kan nihna kha tûn thlengin a la bo thei lo a nih hi. Amaherawhchu, Kristian kan nih a, Krista zuitu kan nih tawh chuan Pathian duh loh leh Bible pawhin thil \ha lo nia min kawhhmuhte hi tih loh mai tùr a ni; Vanram min hruai thleng lo theitute an ni tlat a ni. Tin, nawmsip bàwlna hun leh nula tlangvâl te tan romantic season a ni lo tih hriat reng tùr a ni; tleirâwl \henkhatte tan suahsual rawngbâwl \anna hun tia kan sawi fo pawh hi kan Kristianna nun nen a inhmeh lo hulhual a ni.

Aw le, Boney’ M  hlate ring tak taka play a, zanlâi thleng thlenga mi dangte tâna harsatna thlen thei khawpa bengchhen leh sahàwkte hi Krismas ti-krismastu an ni lo va; zu leh sa leh sex life nèn nawmsip lo bàwl pawh a hnu lawka zahna kàwna min dintîrtu mai a ni. Khaw chhûng chei leh In leh a vêl chei pawh hi pâwn lam thil a la ni cheu! A pawimawh ber zawka chu- Krismas ni hi Lal pian ni dik tak a ni lo maithei; Amaherawhchu, I thinlung- mite hmuh theih loh, Chung lama mi chauh hmuh theih si-ah khân Lal lo pian nawnna ni lo ni ngei se la. Tisa lam puarna chauh ni lo, Thlarau lam nun siam tharna leh Thlarau lam chaw tak lâkna hun ni thei ngêi tùrin Lal Isua hmingin Mizo mipuite Masi Chibai kan inbûkin duhsakna sâng ber kan inhlàn mawlh mawlh ni teh se!