KRISMAS HMAN DAN THA (Drama)

                                                              -  Kamliana Lhouvum

Announcer:  ( Mawia hi Sawrkar hnathawk, mi hausa tak leh Kohhran mi tak a ni. Lal pian hun champha - Krismas hi a ngai pawimawhin a theih ang tawkin a neih ang angte chu Krismas a lo nih hian In leh a vel chei nan te, chhungkaw thwmhnaw lei nan te leh chawhmeh tui tak tak lei nan a hmangral thin.) Mawia chuan nupui- Feli a nei a; fa pahnih- Mami leh Lawma te a nei bawk). Kum dang ang bawkin kumin pawh khawpui lamah Krismas thawmhnaw lei turin a va kal leh a.)

Mawia: ( Nuam ti tak leh lungsi takin kawtlai leh mipui bazarte thlir vel pahin motor a khalh ang)
A nuam leh dawn mang e! Nikum lam ka hmang nuam bawk a; kumin pawh khawnge, fate leh chhungteho làwmna tur i han tihsak leh teh ang hmiang!

 (Mawia chuan thawmhnaw man to ber ber leh \ha ber berte chu  a lei a; tin, chu mai a la ni lo, Sa chi hrang hrang leh in tur lam thlengin a lei a)

Announcer: Chutia a duh ang tak, lungsi taka a lei zawh hnu chuan Mawia chuan in lam pan turin a inbuatsaih a.

(Mawia’n car a khalh ang) in lamah haw a tum ta a. Chutia in lam pana a tlan mek lai chuan kawng laiah nufa berh ve tak, a fanu zawk lo tap lai mek chu a hmu ta a. (Motor chu tidingin chu mite fanu inbe lai chu a thlir ta a..)

Fanu: (Tap chung leh inhnit faih faih chungin) Eng mah min lei ve ngai lo reng reng. Kum tin Krismas-ah kawr thar, thawmhnaw thar leh thil thar ka lei ang che min ti reng a; mahse, masi a lo thlen a piangin sum kan nei lo, leina tur pawisa ka nei lo i ti reng ringawt mai.

Nu: ( Lungchhe takin) Ka fanu, kan harsa em a ni. I pain min boralsan tawh si a. Hei, kei lah heti mai hi ka ni a; kan sum thawh chhuah ang angte inenkawl nan leh damdawi lei nan kan hmang ral vek tawh si a. Bawihte, theih ni se, mi dangte ang bawka fate thil tha, thawmhnaw tha leisak che hi ka chak  asin! Bawihte, ka thiam loh a ni, kan rethei em atin a ni!

Fanu: (Tap pahin) Heti ang hi chuan  Biak inah pawh ka inkhawm ngam leh lo ang. Mite chu thawmhnaw thar leh thil thar nen an rawn inchei leh emaw a ni ang a; kei ve zawng eng mah nei loin ka awm leh ang a, thiante pawh kan kâwm ngam lo ang. Khawvel hi a hrehawm a ni, dam reng pawh hian awmzia a nei lo a ni, ka nu. Thih mai te hi ka chak tawh a ni, dam hian awmzia reng a nei tawh lo ve.

Nu: (A fanu chu a kuah a) Ni lo e, bawihte, kan dam ang a, ka la leisak em em ang che. Ka hmangaih che alawm! bawihte….

Announcer:  Chutia an inbiak reng lai chuan Mi hausa, Mawia chuan an hnen lam a va pan a..

Mawia: (Lungchhia leh inhnit faih faih chungin a bazaar-na bang sum, Rs 5000 chu a phawrh a) Kha ka pi, lo nei rawh u!

Nu leh fanu: (Mak an ti hle a) Eng nge awmzia, ka pu? Kan pawisa tur maw?

Mawia: ( Tlanchhe pahin.. rang takin car lam pan pahin) Aw, in pawisa tur a nih kha? Mas thawmhnaw lei nan lo hmang rawh u. ( Mawia chuan motor chu tinungin a rang takin in lam a pan thuai a)

Announcer: Chutia chhungkaw pa ber bazaar lo haw hun chu nu leh fate chuan an lo nghakhlel tawh hle mai a; tlumte thlirin an lo thlir a ni ber mai.

Feli (Mawia nupui) : (A fate bulah chuan… ) Mami,Mama! In pa a lo thleng tawh a nia! Lo hmuak rawh u. Lo tlan r’u, lo tlan r’u le!

Fate( Lawmi leh Mami) : Yessiii! Eng nge min lo hawn ang aw? Tlan ang, tlan ang!

Announcer:  Chutia a nupui leh a fate’n hlim tak leh beisei taka an lo thlir a, an lo hmuah lai chuan pa ber chu a hlim lo tlat.

Feli( Mawia nupui) : Lawma pa, eng nge ni ta? I va hlim hmel loh ve?

(Mawia chuan In chhunga mas tree leh thil cheimawite chu a tichhia a,a dah khawm vek a)
(A nupui leh fate chuan eng dang mah sawi lem lo chuan  mak ti takin an thlir thup mai a…)

Mawia: Nakinah chhungkaw maicham kan neih hunah a chhan ka hrilh dawn che u nia!

Announcer: Tichuan, zanriah an ei hmain chhungkaw maicham an siam ta a; Sanga pawh chuan vawiin lama a bazaar-naa a thil tawnte chu a nupui leh a fate hnenah mittui tla chungin a sawi a.. A nupui leh a fate pawh chu an lo inhnit hlawm a, an pa ber thusawi chu an lo tawmpuiin an lo lainatpui hle a.

Mawia: Aw le, tunah chuan Mas hman dan dik tak chu ka chhar chhuak ta e. Pathian zarah keini chu sawkar hnathawk kan ni a, kum tluanin kawr thar leina tur kan nei a, chawhmeh tui tak tak leina tur kan nei reng bawk. Kan ngaihtuah phak miah loin mi rethei tak tak, fahrah nu leh pa nei lo, hmeithai pasal chhungkaw chawmtu nei tawh lo leh damlo mi harsa tam tak an lo awm reng mai. Anmahni pawh hian Lal lo pianna tur hun hi âm tak leh hlim taka hman ve an duh asin! Chuvangin, vawiin lam bazaar ka thil leite leh kan pawisa lo khawl tawh sate hi kan kohhran leh khawtlanga mi harsa zawkte tanpui nan I hmang ang u aw.

Feli (Mawia nupui): ( A  pasal thusawi chu support hmel takin a rawn ding ve a) Ni e, Kan kohhran leh khawtlangah tar chak lo, hnathawk thei tawh lo, an fate’n an ngaihsak vak loh tam tak an awm ve a; tin, damlo damdawi ina awm mek an awm bawk a, chung mite chu tanpuina pe thei i la, mi dang tana malsawmna thlentu kan ni ngei ang le.

An fate pawh chu an hlim hle a…

Mawia: ( Bible a la a, a chhiar a) Luka 6:38 “Pe rawh u; chutichuan, pekin in awm ang, thahnemngai taka teh a, beng muk a, sawi muk a, liam zawih zawihin, in mal chungah an pe ang che u. In tehna ngai bawkin an tehsak leh dawn si che u a,” a ti a. Tunah sawi duh leh Pathian thu sharing nei duh apiangte tan hun i lo hawng ang.

Feli : Mami pa Bible chang rawn chhiar ang khan zan inah mi harsa leh tanpui ngai awm apiangte tanpui turin kan chhuak dawn nia. Lal Isua ngei pawh khan lei mihringte suala thi tawhte- hremhmun meidila tla vek tawh turte min hmangaih em avangin, a ropuina Lalthutthleng pawh thlahlel thei loin kan tan thi khawp hiala inngaitlawmin mi dangte nun nan, mi dangte tan malsawmna ni turin Kraws-ah a rawn thi a ni a. Hei vang hian mi dangte tana malsawmna thlen tura a rawn pianna tur niah hian keini chhungkua pawhin Lalpa tan, kan tana malsawmna a rawn thlenna ni hriat rengna tur atan mi dangte tan malsawmna tur thil i tihsak ve ang u. Chu chu a ni, Krismas kan hman dan tur leh krismas hman dan tha chu.

Tichuan, an zain an ding a, Lal Biakna an sawi rual a, hlim takin zanriah an kil ho ta a.