KOLASIB-AH THIL THA A CHHUAK DAWN LO VEM NI?

                                                                                    - Kamliana Lhouvum

                  Kolasib khua hi khaw nuam tak mai, awih lutuk si lo, zâwl lutuk bawk si lo a ni a; khua erawh district dangte ngaihtuah chuan a lum deuh emaw ni chu aw a tih theih. Ni e, zirna sikul tha tak tak te, Office building tha tak tak te, infiamna lam zirna te leh lui mawi tak tak te kan lo nei ve reng mai. Celebrity lamah lah ni se, ram pum huap pawha lar leh hriat hlawh tak tak kan nei nual a; an hming hmer chuan sawi kher lo mai i la, a tha àwm e. District dangte tih theih leh neih angte hi chu kan nei ve thei zêl mai a, kan awt bik teh chiam lo.

Pic: Diakkawn Square, Kolasib

                 A ni asin! Hla phuah thiamte chuan kan ‘SIB khawpui hi “ Hmangaih berte lenna” tiin an lo châwi vul tawh a; thenkhat tan chuan hmangaih berte lenna chu a ni chiang mai. Vai ram hnaih ber khua tih takah a mi chêngte pawh kan hàng deuhvin a hriat a; a lum deuh bawk a, Aizawl te nen khàikhin phei chuan lum tak a ni. Amaherawhchu, kut hnathawh tamna hmun, lo neia ei zawng tamna hmunah hian khaw lum avângin tu mahin chaw kan nghei phah chuang lo va, hna kan thawh loh phah chuang hek lo. Tharum ngah leh taimâkna kawngah chuan district dangte lakah pawh tè eih lo kan ni.

                 Inkalpawhna lam lah ni se, kalkawng nei tha ber pâwl kan nih a rinawm a; District dangte’n kawng ping leh khúp thleng thleng tea chirh leh dûm an dài a ngaih lai paw’n keini khua-ah chuan chuti êm êm-in buaina kan tâwk ngâi meuh lo; Rêngte tlâng sângah erawh leimin avâng leh lei tawlh avângin kawng ping leh motor kal theih loh zauh chu kan nei leh thin a. Chu lovah pawh, Kawlphetha(Electric) nei tha ber pâwl khua kan niin ka hria a; êng kan nei tha lo tiin han phun ve bawk thin mah i la, Mizoram hmun dangte thlìr chuan nei tha tak kan la ni cheu mai.

                 Ei zawnna lam han thlîr leh ta i la, Vairam kan hnaih avângin ni tin mamawh châwk luhna leh Bungrua /thawmhnaw lak luhna a awlsam a, tin, a tlâwm zâwk bawk a ni. Bazar-na lam ni sela, Vairengte leh Bhaga/ Silchar kan hnaih avângin lehlângin kan Bazar thei leh nghâl. Sumdâwng mite tân hlei hlei Kolasib khua hi khaw nuam a va ni lehzual dâwn em!

                 Chuti ang taka khaw vannei leh khaw nuam tiin sawi mah i la, lung làwm a kim si lo; Mizoram level-a kan contribution en hian kan la thêunêu deuh a ang. Zirna in tha tak tak kan neihte hian a tlangpui thuin state level-ah result chhuanawm tak tak kan rah chhuahpui thei lo va; tun hma deuhte kha chuan Mizoram level-ah te pawh kan lang zak zak thin kha a ni si a. Tin,Infiamna lamah ni se, state dangte  kan phak ta meuh lo niin a lang bawk. Sawrkar hnathawk lamah en leh ta i la, Kolasib District chhunga Dept. hrang hrang 50 chuang awmna office-ahte hian kolasib khua leh tui kan tam lo hle a ni; a hna sâng leh zahawm chin chelh phei chu kan tam lo lehzual a ni.Heti ang a nih zel chuan engtin nge kan khuaah hmasâwnna tluan tling kan neih ang a, engtin nge kan lo changkàn theih tak ang le?

Pic: St. John's Hir. Sec. School

                 Hmasawnna leh changkânna kan tehna hi sum leh pâi ngah lamah ringawt kan teh chuan kan teh sual ngei ang le. Kan tu leh fate leh thang leh thar lo awm zêl tùrte hian engtin nge kan khua a lo changkân theih nan hma an rawn lâk ang? Engtin nge kan sulhnute hi an rawn chhawm nun chhoh zel ang tihte hi kan dawn thiampui a hun tawh tak meuh meuh.

                 Thil lawmawm tak chu: tunlâi hian zài lamah hma kan sawn a, zâithiam tam tak kan nei deuh reng mai, a lawmawm hle. Chutih rual rualin, zài lam hi ei zawnna tlak a tling em? Professional job-a thlang turin a rin tlâk ang em tihte hi zawhna lo awm thei chu a ni. Zâithiam kan ngâisâng a, celebrity-ah kan ngâi nghál pang a; Amaherawhchu, an talent-te erawh ei zawnna tlâkin kan zah thiamsakin kan ngaihhlutsak thiam leh chuang si lo.Ram dang hmun dangahte chuan Zâithiamte hi khawvela sum la lut hnem leh hausa ber pawlte an ni phak thin a; keini stage nen chuan inang lo tak a ni. Ka sawi tum ber chu: zâithiam kan ni a nih pawhin ei zawnna tlâk khawpin zai lam i tui chilh ang u tih hi a ni.

Pic: Rengtetlangsang kawng

                 Ram hmasâwn leh changkâng tehna ber chu: “ Ram mipuite sum leh pâia an hausak leh neih-nun lamah a ni lo va; a ram chhûnga chêng mipuite hrisel leh hrisel lovah a ni zawk” an lo ti thin. He thu hi a dik asin! Kolasib ngèi pawh miin kan changkàn leh changkàn loh an tehna ber tur chu: kan hausakna lam ni loin a khaw mipuite hrisêlna that leh that lovah a ni. Health Dept. thuchhuak atanga a lan dànin tûn dinhmunah Kolasib khua hi Mizoram puma HIV/AIDS  vei tamna ber District kan ni mêk a ni, a zahthlâkin a va lungchhiatthlâk tak êm! khaw changkang leh hmasâwn nih chu kan la hlat hlê a ni tih a lang chiang hlê a ni.

                  Aw le! Kolasib mipuite u, a tìr lama kan sawi tak ang khan, heti taka khaw nuam leh vânnei kan ni chung sia khaw changkâng leh hmasâwn kan ni thei lo hi eng nge a chhan? Tu mawh nge? Engtin nge hma kan lâk tak ang tihte hi keini khaw neitu leh khaw mipuite hian kan ngaihtuah tlân a hun tawh tak meuh meuh! Politics level-a khaw mipuite veitu chauh ni loin a tak rama mahni chhungkua leh khawtlang atanga hma kan lak a, kan tan tlân a pawimawh tawh takzet a ni. Chuti a nih loh chuan tûn ai hian kan dinhmun hi a tla hniam tawlh tawlh ang tih hi mi mawl ber pawhin a hriat thiam theih tawh a ni. Khua a tlai hmain kan pawn vènte sawi chhîngin mipa takin huaisen takin hma i la ngam tawh teh ang u khâi! Kolasib khua-ah thil tha a chhuak dawn lo vem ni???

                (Zawh duh leh comment duh tan a hnuaiah hian a comment theih e.)

                 Contact duh tan: 8131934113 OR Email: lelenlv.lhouvum11@gmail.com