- Kamliana Lhouvum
Rawngbawlna tih hrim hrim hi Mizorama cheng zofate
tan chuan a larin hre lo fa kan awm àwm lo ve. Rawngbawlna kan hriat lar zawk
hi chu Pathian rawngbawlna emaw, kohhran rawngbawlna emaw lam hi a ni zawk mah!
Ram rawngbawlna lam erawh rawngbawlna tlingah kan ngai lo nge ni, kan
ngaihtuahna hian a tin zawn thei lo a ang riau.
A ni viau lah tak a, ram rawngbawltua kan hriat
heng: kan ramhruaitu te, MLA te, Party leader te, Organisation hrang hrang
hruaitute leh tlawmngai pawl hruaitute hi chu kan ngaisanga kan dah san viau
rual hian tlema mi eawng thei deuh, mi thiltithei deuh, eiru thei deuh
leh dawtsawi hmang ni turah kan ngai
nghal mai thin. A dikna chin pawh a tam viau reng a ni! Kan ram rawngbawltute
hi kan hmuh phek leh kan hriat phek chinah chutiang mi corrupt, dawtsawi hmang
leh mipuite chan-ai ei zotu an lo ni chawk; an zavai chuan a ni lo ang
a;amaherawhchu, a tam zawk hi chu an ni chiang mai.
Zawhna lo awm thei ta chu; engah nge ram hruaitu tha
tak takte hi Pathian rawngbawltu tha tak an nih ve kher loh?, Pathian
rawngbawlna leh ram rawngbawlna hi kal kawp thei lo an ni em ni? Zawhna tam tak a
awm thei nge i ang le? Khawvel a changkang chho mek zel a, hmasawnna
pawh a zuanin a zuang lauh lauh emaw tih mai tur khawpin thiamna leh finna
lamah kan inel a, kan intlnsiak mêk zawng a nih hi maw!
Mi tam tak chuan Pathian thu leh ram rawngbawlna hi
kal kawp thei lo hul hualah kan ngei a,tun lai mila Chanchin Tha leh Pathian
thiltumte bo chuang lo va insiamrem/ her rem hi kan duh thei tlat lo. India
ram khawpui nuam leh mawi berte zinga mi,Bangaluru-ah khuan an Assembly House
(Vidhan Saudha)-ah, ‘ Government’s work is God’s work’ tih thu tê hi mipui
te leh visitors te hmuh theihin fiah tak leh chiang mangkhengin an ziak kuau
mai, ngaihtuah a tithui hle mai!
Vai ram, ringlo mite chenna ramah ngei pawh
Sawrkar hna hi Pathian hna/rawngbawlna tluka an ngai thei a nih si chuan kan
ram Kristian 80% chuang lai awmna state-ah hian engah nge Pathian rawngbawlna
chi khatah kan ngaih theih loh tehlul ang le? Nge ni ang a, kan ram hruaitute
hi Ringlo mite aiin an khawlo zawk? Hnai lo ve! Kan ram hruaitute hi Pathian tih mi, an hlawh atanga thawhlawm
thilpek-ilo leh sawmapakhat pe tha ber berte an ni zawk asin! Pathian mit an
tlung meuh em tih erawh Pathian thu thu
ni sela.
A nih engah nge chutiang fakauva Pathian leh A kohhran
tana sum leh pai seng hnema inpe zote chu mi dik lo, mi fel lo leh eiruk
hmang kan tih leh lawi si? Thudik chu hei hi a nih hmel; Pathian tihna tak
tak kan nei meuh lo.Kan Pathian hi duh duha kan bum leh tlawn lungawi theih
tawk lekah kan ruat zawk a nih hi.
Chutih rual rualin, Kohhran rawngbawltute pawh kan
fel faiin kan fihlim e ka ti bik lo. Ram leh hnam a lo din chhuah nan; a chhe
lai siam thatu ni tur leh Pathian nung nei ram ni tir hian Pathian leh
Kohhran rawngbawltu tha tak takte pawh hian kan rawngbawlna huang kan zauh a
ngai ta. Kan ramah eirukna, hlemhletna leh dik lo taka thil tih hri tha lo
a ln mêk laiin kohhran huang chhunga member-te chauh kan vui a,
chupawh, Biak In compound huam chinah te chauh! Rawngbawltu tam tak Biak In
compound pelh china hman tlak loh leh entawn tlak lohte hi an va tam ta m!
Pathian chuan A chanchin tha puang darh turin min ti na meuh mai;
amaherawhchu, kan nunah rahchhuah leh ei tur chaw tak a awm si loh chuan kan thahnemngaihna te
hi a lo thlawn mai a ni ang tih a va hlauhawm kher em!
Pathian thu hi sawi thiam lamah emaw kohhran pawl dang
thurin leh zirtira insawi chhiatsak thiam lamah a innghat lo va; tin, chuti ang
chu ringtu tha tehna tur a ni ber lo bawk. Kan nunah hian lang theiin
heng: felna, dikna, thianghlimna, rinwmna te leh inhmangaihna te hi awm rawh
se! Chutiang a tak rama Pathian ih mite hi an ni ka ngaih san leh ram hruaitu
tera ka duhte chu.
Ringlo mi tam tak pawhin mihring felna leh thatna ram
atangin ram an enkawl/ kaihruai a, an hlawhtling viau mai. Keini Pathian hriat,
a thlan chhuah bikte tan phei chuan engah nge dik tak leh fel taka ram
rorelna kan neih theih loh tehlul ang! Tlai ngai lo, a hun tak che thin,
dikna leh felna ngaina Pathian chuan min tanpui dawn alawm!
Khai le! Ram hruaitute chu tlawma fel lo, dik
lo,corrupt leh dawtsawi hmang ni tura kan ngaihbelna thinte paih bo ila,
Pathianin zofate ten liau liauva ram min pek, kan ram neih chhun, Mizoram hi i
vei tak taka i hmangaih tak tak a nih ngai chuan ram rawngbawlna hi Pathian
rawngbawlna angah ngêi ve rawh. Kan ze tha leh Pathian thu nen inmil thlapin
zofate tan ram hruaitu tha nih i tum ang u. Chuti ang chu a ni kan ramin min
beisei dan leh zoram mipuite pawhin kan lo suangtuah fo thin; mut mawh hnar
mawha kan lo neih chu. Chuti ang ram hruaitu tha chu alawm tunlai kohhran
rawngbawltu inti tam takte aia ka ngaihsan zawk leh Mizoram innghahna lo la ni turte chu.
0 Comments