I LAM DIAL DIAL MAI ANG U AW!!

I LAM DIAL DIAL  MAI ANG U AW!!

                                                                                           Kamliana Lhouvum

UPC te leh LAM hi thil inkawp tlat,lakhran/sawihran theihloh a ni a.Mihlim kohhran,thlarau kohhran tia inchhal kan nihna zawn atang phei chuan lamtual a lam hi thil pawimawh tak mai leh thlarau thianghlim dawn theihna,dawn tanna hmun a ni ti ila kan sawi sual tam awm lo ve.

Kan naupan deuh lai te chuan (han ti ve khang lang ila!!) LAM te,khuangvuak te,etc te hi tihmakmawhah kan ngai thin a,inkhawm a piangin khuangvuak loh chuan LAM a ni leh mai thin a.Hemi kawngah hian nu leh pa te hi ka theihnghilh loh leh sawihmaih theihlohte zinga mi an ni a.Kan nu leh pate chu mihring mihrinna atanga thlir chuan tlawm te leh Officer lian leh mi challang tak lo ni lo mah sela,Pathian thutak leh inkhawm ngaih pawimawh chungchangahte min kaihhruai thatna zar kan zo tak meuh meuh a,zirna lamah te leh kawng dangah te pawh mi te ang kan lo ni ve thei niin ka ngai thin.

In sawi thei tan dawn tlat!! Thupuiah lut leh ta ila..Lam chhan hi mitin ah a in ang vek kher lo ang a.Amaherawhchu,khawvel tisa thil lampanga LAM hi kan topic a ni lo bawk a.Chuvangchuan,kan lam chhan ber chu kan Pathian Lal Isua chawimawi kan duh avang a ni ngei ang. Tin,mi thenkhat chuan tisa leh thlarauva chakna an neih theih inbeiseiin lamtualah anmahni mawi lohna leh miin engtinnge an ngaih ang tih pawh dawn lo va an lam thin a rinawm bawk a ni.

A eng a pawh chu lo ni sela;kan lam chhan te in ang lo nuaih mah sela,Lamtuala LAM hrim hrim hi thil sual a ni lem lo va,mi pawisawina a ni hek lo.Chuvangchuan,mi hlim tawngkam tak pawn,kan rau emaw rau vak lo emaw lam hrim hrim hi thiltha a ni a,kan intihhmuh thar zel a mamawh tak zet zet a ni.

Ngun takin in kan inkhawm chhan te hi ngaihtuah thin ila,kan fianrialnaah emaw zan muthmunah emaw mahni chauhva mal taka kan awmlai te hian;Pathian thuthlung (tui leh thlarau baptisma) kan chan a,piangthar nun dik tak kan neih tawh chuan inkhawm te hi a tul vak lo kan lo tite a nih pawn ;chutiang ngaihdan chu a dik lo va, vanram an kai lo ang tih tuman kan sawi thei lo a ni.Chutiang ngaihdan neite pawh chuan an tisual em em lo nite pawn a lang thei tho mai.A chhan chu,thuthlunghlui hun lai ang khan Sabbath serh Ni (Chawlhni) hi Ni hranpa pek kan ni tawh lo tlat a.Inkhawm avanga vanram kaina tur chhan pawh awm em em in a lang lo a ni.Vanram kai theihna Ticket (chhandamna thuthlung) kan neih tawh chuan vanram kan kai leh kailoh chu Pathian chauhvin a Judge thei tawh a ni.

Amaherawhchu han ti zel te’ng;chhandamna neiin vanram ticket pawh lo nei tawh mah ila,khawvelah hian ringtute tan tlukna tur tam tak a awm thin a,chutiang thlemna leh tluk theihna atanga kan him a, kan chak loh lai pawha intichak tawna,kan thlarau mei te a mit loh nana inchhem alh sak tawn tur chuan Kohhran kan belh a,Kohhran huang chhunga kan lawi a,khawvel mite thlir dan pawh a mi entawntlak,Kohhrana inhmang mi kan nih hi a  pawimawh leh em em tho si a ni.Chutiang a lo nih takah chuan kan inkhawm chhan ber chu rinna a kan din ngheh theihnan a awmdan tha te,nungchang mawite,Pathian thudik leh hmasawn kan inzirtirna hmun a ni kan ti thei ta a ni.

Lam peih em em emaw rau thei em em emaw, a tul huna tawnghriatloh nei tha thei em em; pawnlama rinawmlo leh entawntlakloh tam tak sawi tur erawh kan awm ve leh tho mai.Buh lem leh buh tak chu to za tur a tih an ni tlat a.Chuvang chuan a lem hi a awm lo thei lo a ni.Mahse thiltha  lo titu te avangin kan intilungngai tur a ni lo va.Mi thenkhat tlem a lem deuh lo awm te emaw avanga  mi lam peih deuh te lo hnualsuat a,lam chakloh phah nana neih tur a ni lem lo a ni.Chu ai chuan mitha te hnung zui zel hi kan tih makmawh a ni zawk a ni.

Lam mi te hi mi hlim thei tak takte,pawnlama nui uar uar thei leh kawm nuam tak tak kan lo ni vek bik lo va.Kan lam dan style te pawh a in anglo thluah mai.Thenkhat chu lam zawng pawh a Lam khal deuh te,in sawi thei deuh te,sai kal ve tawp mai te kan ni thluah mai.Mahse kan lam chhanah kan chian chuan engmah zah tur hi lo awm vak lo a lo ni zawk a.

Nu leh pa leh tar upa lam te hi chu lo dah tha ta ila.A chhan pawh an vanglai leh an thatlai hunah te an lo lam nasa in kohhranah an inhmang nasa ang tih chu an kum leh an hmelte en mai pawn a lang thei tawh a ni.Chuti ni lo va,thatlai huna Kohhran bel lo leh inhmang vak lo tan erawh a Lam hi a pawimawh zual a.Heng kan sawi tak te avang hian tar upa lam leh nu leh pa lam tan Lam chu a pawimawh lo tihna erawh a kawk chuang lo a ni.

Thalaite hian zirtirna tha leh kalkawng dik kawhhmuhtu tha kan neih chuan,thuawih thei tak leh tihnuam tak kan ni tlangpui tawh a.Sikul kal lo thalai kan awm mang tawh lo a.Chuvang chuan,kohhran nung leh hlim,mi hlim kohhran ni reng tur chuan Lam pawimawhna leh kan lam chhan tur te hi  hruaituten thalaite hnena kan sawi uar thiam te hi a ngai a.Chutihrual rualin,Hlasak lai a mi hla sa tui; lo ding hle hle te lam tura va in nawrluih tawp te hi thiltha chu ni tho mahsela kal kawng dik,lam chhan tur kan kawhhmuh thiam chuan loh chuan an rilru ah hna a thawk rei lo a,an daih rei tak tak thei lo fo a ni.

Thlarau thianghlim kan chang emaw chang lo emaw,min siamtu hi Pathian ropui a nih avang leh faktlak a nih avang hrim hrim hian lam lo theilo a in ngai in kan lam mai tur a lo ni zawk a.kut beng thei,zai thei,kut leh ke kan neih avanga lam mai tur kan lo ni zawk a.thlarau kan dawn avanga thlarauvin lamtuala min nawr chhuah kher nghak lo vin emaw thlarau zakhamna chang tawh kan lo nih tawh avanga ka lam loh chuan mi in min ngainep ang;a awm lo an ti ang tih lam ngaihtuah lo vin kan rau emaw rau vak lo emaw kan lam mai tur kan ni zawk a lo ni.Thlarau chang tawh a khawih tawhte tan phei chuan mi hla sak laia lo dinkhawng ah maite hi a inhmeh ta chiah lo a ni te pawh kan ti thei awm e.

A sawi hi ka hre reng thin a.Tuna Delhi a kan pastor ni lai mek,Pastor T . Laldingliana (udingtea) hian a tia lawm.Tun hma a pianthar tirh khan thu a lo intiam a Pathian hnenah.B.SC min pass tir a nih phawt chuan ka inkhawm leh hmasak berah ka lam ang tiin a intiam alom mawle..Tichuan a intiam ang ngei chuan B.SC chu tha takin a pass ta ngei mai a,chuveleh tunhma a ala tih ngai miah loh a zah em em chu  tih a ngai dawn ta..chu chu LAM a ni.Lamtuala a inkhawm hmasak ber tuma a lamna tur chu khatih hun lai a NEI UPC leh MIZORAM UPC tena kan inchuh mek Kolasib venglai biak in kha a ni a.Media ho chinchang hre duh leh news a chhuah turin media ten an rawn cover ni tak a ni a.Chutah le; Udingte a chuan hreh chung chungin a mah chauh chuan a lam ta nghek mai a.MZ UPC palai leh NEI UPC palaite lah chuan LAM a hnekin an innuai lo chauh a ni a..chuta karah Udinga chu amahte chuan tuilo fahranin a lamkual ta zet zet mai a ni.Miten, ‘tunhma pawha lam ngai lem lo,mi buai lai laiah te a lam a’ an lo tinuk a ni awm e.hehehe.Ama experience atang hian kan hre theuh awm e;harsa taka a intiamna a tihhlawhtlin avangin Lalpan a hmang chho zel a,Lalber sipai thami a nita reng mai a nih hi.

Bible-ah thil engkim tih a thiang a,mahse thil engkim tih hi a tha vek kher lo a ni tih kan hmu a.Entirnan zu te pawh hi a inthiam tan chuan damdawi tha tak te pawh a ni thei tho va.Chutihrual rual chuan kan awmdan leh thiltihte avanga midang/kan unaute an tluk dawn chuan; chu chu thiltha lo a ni tih kan hmu leh a.chuvang chuan rinna tlem zawk leh ringthar zawk te kan zu in avanga an tluk dawn ai chuan kan in loh ngam a,kan insum mai kha a tha mai a ni.A bik takin kohhran hruaitute tan phei chuan fimkhur a tul zual a ni.Kan zu in avanga beram Pakhat chauh pawh kan chan dawn a,kan tih tluk dawn ai chuan zu kan in ngam loh mai kha a finthlak zawk a,ringthar leh rinna tlemte tana kan nunah Krista aia Sual Setana ropuina lanna tur a nih ai chuan I thiltih chu thianglo ni lo mahsela Pathian ropuinan I zu in kha sual em em ni lo mah sela I tihloh ngam a ngai tihna anih chu.

Chutiangchiah chuan thlarau dawng tawh te kan nih a,miin lam ngei tura min beisei sa reng  lai pawh a,kan lam duh loh chuan emaw lamna chang kan hriat loh chuan;kan nunah ringthar leh rinna tlem thalai leh naupang zawkte pawh a niang chu,kan nunah ei tur an  hmu lo ang a, entawn tur tha an nei dawn lo tihna a lo ni dawn a nih chu.Diktak chuan kan lam loh chuan thil sual ti kan va ni hran lem lo a ni,tuman kan lam loh avang khan misual ah pawh min ngai lo ang.Amaherawhchu,memberpuiten lam tura min lo beisei san laia kan lam loh a,kan nunah Sual setana a lo ropui dawn ai chuan khawnge kan lam mai ang e tihna chang hi thlarau zakhamna chang tawh member emaw hruaitu tam tak te hian kan hriat a tul tak meuh meuh a ni.Memberte entawn atan hrim hrim pawhin  lam I uar the ang u khai!!Kan nu leh pate lam thang,lam mi an nih phei chuan automatic a kan lam peih ve a ngai a.Nu leh pa entawn tur tha nei lo thalaite pawn keimahni hi chhungkaw siamtha theitu leh tichaktheitu kan ni tih hriain hma ila thar leh ang u khai!!

Inkhawm hla sak laia thutna awl hmuh tur a awm mang loh chhung chu kan lam tha tawk lo tihna a ni mai a.Hlasak lai hian thutna hi awl in ruak thup mai zel se lang chuan a nuam dawnin thlarau lam boruak te pawh a lo thlen hnaih zawk a rinawm a ni.Chutianga a pui apang alian ate sawi chuang lo va kan lam mup mup hun a lo thlen a va nghahhlelhawm kher em!!

Awle,a tawp berah chuan Pathian thuthlungah chiang em em phawt mai ila,UPC nih pawh nuam kan ti tawlh tawlh ang a.UPC ni reng chunga Pathian thuthlung,thutak a chiang lo kan nih chhung chuan kohhran thiltih leh activities kawng engkimah kan phur tak tak thei ngai lo vang.Chu achhapah UPC nih kan inzahpui hun pawh a lo thleng ngei ang.Chutah Kohhranah mawhphurhna kan neih te leh kan tangkaina pawh kan hre pha thiam lo bawk ang.Chuvangchuan,Thuthlungah chiang ila,chu veleh LAM a nuam ang a.Pathian ropuinana kan kut leh ke,kan awka te chu uihawm kan ti tawh lo ang a.Engkimah lungngawina kan lo nei ang a.Kan chantawkah kan lungawi thei zel mai dawn a lo ni.

Kan thatlai hun,kan vanglai hun,kan damlai hun hian khawnge kan LAM ve reng reng te’ng!,vaivuta kir leh mai tur ka ni a ka lei taksa hi,’ka damchhung tawiteah Lalpa ropui nan chauh Lamtualah khawnge kan lam ve tawh ang e’ ti theitu nih theuh I tum ang u.Kan damlai,kan thatlai nite hi engtikah emaw chuan a lo chuaiin a lo liam ngei dawn si a.Kan thatlainite hi a rei dawn si lo va.thawhtheih loh hun a lo la thleng ngei dawn si a.Thawk thei,lam thei,ei thei a kan awm lai hian khawnge UPC member te a pui a pang,a lian a te,member satliah atanga hruaitu lawk thlengin.. I lam ho dial dial ang u! Kan ropuina ni chu a nitelin a hnai tawlh tawlh tawh si a.Kan rintirh lai ai khan tunah chuan kan chhandamna ni chu a hnai tawh si a.

Lalpa’n chhiartu zawng zawngte malsawm vek che u rawh se! Amen!